Årdal kommune har gjennomført «Stjernedagen» – ei eiga samling der personar med utviklingshemming har vore med å setje retning for vidare utvikling av bu- og miljøtenestene.

Samlinga er eitt av fleire lokale tiltak som er utvikla med støtte frå CRPD-nettverk Vestland, eit samarbeid mellom USHT Vestland (Hordaland) og USHT Vestland (Sogn og Fjordane). Målet er å bidra til at FN-konvensjonen om rettane til personar med nedsett funksjonsevne (CRPD) blir omsett frå kunnskap til konkret praksis i kommunane.

Frå kompetanseheving til handling
CRPD-nettverket har over tid arbeidd systematisk med å styrke kompetansen om rettar, brukarmedverknad og beslutningsstøtte i kommunane.

- No ser vi i aukande grad resultat av dette arbeidet gjennom konkrete tiltak lokalt. Vi ser ei viktig utvikling frå eit prosjekt med hovudvekt på kompetanseheving, til at kommunane sjølve set i verk tiltak som fremjar brukarmedverknad i praksis, seier Anne Marte Sølsnes frå USHT Vestland (Sogn og Fjordane)

Gjennom prosjektet har kommunane fått tilbod om fagleg og praktisk støtte til tiltak som fremjar reell brukarmedverknad, synleggjer medborgarskap og styrkjer fokus på beslutningsstøtte. Samstundes har USHT vore ein aktiv samarbeidspartnar i planlegging og gjennomføring.

Foto: Tiril Jevnaker Grytbakk ynskjer velkomen.

Brukarane i førarsetet
I Årdal har «Stjernedagen» blitt planlagt og gjennomført i tett samarbeid med brukarane sjølve – noko som er ein føresetnad i arbeidet med å styrke brukarmedverknad. Gjennom samtalar, spørsmål og gruppearbeid fekk deltakarane dele kva som er viktig i kvardagen, og kva dei ønskjer å bestemme sjølve.

- Innspela viste mellom anna behov for større grad av sjølvbestemming, kombinert med tryggleik og god støtte, seier Kine Teigen, avdelingsleiar på Grandane bufelleskap i Årdal kommune

Tema som arbeid, aktivitet, relasjonar og moglegheit for å ta eigne val kom tydeleg fram som avgjerande for livskvalitet.

- Innspela skal takast med når ny Mål og handlingsplan for tenestene skal utviklast, seier Marit Njøs Natvik, tenesteleiar i Bu og miljøtenesta i Årdal kommune

USHT Vestland (Hordaland) og USHT Vestland (Sogn og Fjordane) har bidrege til samlinga med rettleiing i metodar for medverknad, mellom anna gjennom strukturert gruppearbeid som sikra at alle stemmer vart høyrde.

Dialog med kommunen
Både ordførar Christian Sønstlien og kommunalsjef deltok på samlinga. Under programposten «A-laget» fekk deltakarane stille spørsmål direkte til ordføraren.

Foto: Jostein Ålhus intervjuar ordføraren Christian Sønstlien.

Her løfta dei fram konkrete tema frå eigen kvardag, som behov for betre transportløysingar og moglegheiter for å ha med personale på ferie. Ordføraren understreka at dette er viktige innspel for kommunen sitt vidare arbeid.

-Ordføraren oppmoda også deltakarane til å organisere seg i eit eige brukarråd – eit initiativ fleire melde si interesse for å vere med i, seier Marit Njøs Natvik

Viktig steg vidare
Innspela frå «Stjernedagen» blir no tekne vidare i kommunen sitt planarbeid. Samlinga har også bidrege til å etablere nye arenaer for medverknad lokalt.

Erfaringane frå Årdal er i tråd med måla i CRPD-nettverket om å auke graden av brukarmedverknad og støtte kommunane i å utvikle tenester i tråd med CRPD.

– Dette er eit godt døme på korleis kommunar kan jobbe systematisk med brukarmedverknad i utvikling av tenester. Når brukarane er med i både planlegging og gjennomføring, blir tenestene mer treffsikre og betre, seier Siv Bjønnum USHT Vestland (Hordaland)

Samlinga i Årdal viser kor viktig det er å skape arenaer der brukarane sjølve får vere med og påverke – og at gode tenester blir til i samarbeid.

-------
Bileta er tekne av Eirin Nyheim Asperheim frå Årdal kommune.